من الفاسد ومن الصالح ايها المغاربة
مكيبان ليكم غير المخزن باش تعلقوا عليه شماعة الفشل والمزايدات المغلوطة:
ماكراهتش حتى انا نبدل هاد المخزن أو نجيب واحد المخزن زوين بحال ديال السويد، ولكن فاش كانجي نقلب على هاد الناس للي مزيانين للي يقدرو يعطونا البديل ماكانلقاهومش… أكثر من هدا اكتشفت أن هاد المخزن هو نفسه هدا الشعب: منكم و إليكم. ...
- القايد ، البوليسي، المعلم، الاستاد، الجدارمي، العسكري، الطبيب، الفرملي، القاضي، المحامي، الديوانة، الشيخ، المقدم، الباشا…. كلهم أولاد الشعب…
أكثر من هدا، دوك الناس للي ما خدامينش مع المخزن ، زعما هوما مزيانين؟ ؟!
- مول صوصيص للي كايبيع لينا لحم الحمار أو الحمدلله
- مول الهري ( مواد غداءية ) للي كايبيع لينا مواد منتهية الصلاحية
- مول الدجاج للي كايبيع الدجاج الميت ( جيفة)
- مول الحانوت للي كايدخل 100000 درهم في الشهر أو خدامين معاه 3 ديال البراهش جايبهوم من البلاد مادايرش ليهوم التغطية الصحية أو حتى هو كايستافد من الراميد بحال شي مواطن فقير
- البلومبي للي كايخدم عندك في الدار ب 400 درهم للساعة خارجة من الضريبة
- الميكانيسيان للي كايدير ليك diagnostic لسيارة ديالك ف 10 دقائق ب 200 درهم: بحال طبيب اختصاصي بدون دفع درهم واحد الضريبة للمساهمة في التنمية.
- المجرمين للي كايسرقو تحت تهديد السلاح أو كايقطعو الطريق ( حتا هوما من الشعب ) عندنا منهم 60000 في السجن أو أكثر منها روشيرشي.
- داك الفقيه للي باسم الله خدام كايسحر لنساء، كايعطيهوم آمال في حياة أفضل بثمن غالي وفي كثير من الأحيان يتسبب في تسمم الكثير من الأزواج بسبب داك الزمر للي كايوكلوهوم...
- داك للي سكران أو طحن مواطن بريء قاطع في ممر الراجلين، عندنا 4500 شخص كاتموت " مطحونة" كل سنة في الطرق حتا واحد ما تضامن معاهم، شكون قتلهوم؟ المخزن ؟؟ اوهو قتلهوم أبناء الشعب بحالهم…
نعم يمكن عندنا الفساد وسط المخزن ( بحالنا بحال كاع الدول) ، ولكن مانساوش أن نسبة كبيرة من الشعب أفسد و انذل و أخطر من المخزن، نهار نقبلو الحق فراسنا غادي نزيدو القدام ولكن ماحدنا نتملص من مسؤولياتنا و نتهم الآخرين
بكل ما يحصل لنا غادي نبقاو اللور اللور….
تعليقات
إرسال تعليق